Eldre kjelder for Norsk Ordbok
I hakeparentesen er det gjevi opplysning om viktigare eldre kjelder — prenta og uprenta — der ordet finst. Det gjeld fyrst og fremst leksikalske kjelder frå 1600-talet og fram til Ross' ordbok med tillegga. Yngre ordbøker, slike som Schjøtts, er jamnast ikkje medtekne når ordet finst i Aasens eller Ross' ordbøker eller i eldre samlingar, og heller ikkje når ordet er velkjent frå litteraturen føre vedkomande ordbok. Lista over ordsamlingar eldre enn Aasens ordbok gjer ikkje krav på å vera fullstendig. Det er hol i tilfanget, og det er av plassomsyn gjevi avkall på sume tilvisingar når tilfanget er rikt og ordet vanleg både i gamalnorsk og nynorsk. Har ordet i vedkomande kjelde serlege avvik i skrivemåten, er dette opplyst like etter kjeldetilvisinga. Dette er gjort både av omsyn til den språklege opplysning skriftforma kan gjeva, og for at det skal vera lettare å finna fram til ordet i kjelda. Det siste er det lagt serleg vekt på når det gjeld Aasens og Ross' ordbøker.
Tilvising til eldre leksikalske kjelder står sumtid i hakeparentesen og sumtid etter definisjonen; om grunnen til det sjå under stad- og kjeldetilvising.
|
